Rematan os eventos na rúa da campaña Teño Monte
O pasado venres 4 de novembro montamos o noso Photocall por terceira vez dende que comezamos a campaña Teño Monte. Iso si: esta foi a derradeira! Aínda que non as tiñamos todas con nós e estivemos toda a tarde cun ollo posto no ceo, a sorte acompañounos e permitiu tamén que a veciñanza da Zona Nova de Compostela viñera a coñecernos, a falar con nós e a participar cos nomes dos seus montes.
Como sabedes, todas as persoas que participaron nos anteriores Photocall e encheron a papeleta entraron no sorteo de 1 noite para 2 persoas en Cabanas do Barranco ou Cabañitas del Bosque, uns impresionantes aloxamentos na serra de Outes.
Ao remate deste evento abrimos a urna e, coa axuda dunha man inocente, puidemos saber o resultado e poñerlle nome e cara ao gañador:
PARABÉNS a Ramón Seijo Sanmiguel!!
Quen por certo, ao enterarse de que gañara achegouse a recoller o seu premio. Así que puidemos coñecelo e entregarlle o premio en persoa.
Gran sorriso de Ramón coa súa papeleta gañadora
A entrega do premio. Parabéns, Ramón!
E con este peche tan especial concluiron as accións na rúa da campaña Teño Monte que comezaran en outubro na Praza de Abastos de Santiago. Queremos dar as grazas a todas as persoas que dun xeito ou outro apoiaron esta iniciativa.
E coma sempre, rematamos a crónica co álbum de fotos deste 3º photocall. Non deixedes de seguir as nosas redes sociais e este blog, porque pronto teremos máis novidades! 😉
